Beim Themenweg gibt`s a neiche Station - a Barfußparcours, des is wos für jede Generation
Aller Anfang ist schwer!
Griaß eich!
I bin Waldi da Maulwurf und I stöh eich heite de Landjugend Rohr im Gebirge vor.
Vor zirka an Joah hob I de Gruppn kennaglernt. Owa bevor i dazu jetzt mehr sog stöh i mi amoi söwa vor. Oiso, wie gsogt, I bin da Waldi und leb seit meiner Geburt do im schenen Rohr im Gebirge. I gib zua, I siach ned so vü … najo, fost goa nix. Owa dafia hea und fühl I um so bessa. Desweng baut de Londjugend ma heia an Fühlpfad. Voi cool oder? Ka Sorge, natürlich nimm I eich bei dem gonzen mit. I hob des Wochenede eh ned so vü zum duan und I glaub es wird echt lustig.
Auf Los geht`s los!
So, oiso fong ma moi am Anfang on.
Des gonze Projekt is am Freitag um 17:00 von da Gemeinde übergebn woan. De Aufgabe vo da Landjugend is: „Gestaltet miteinander einen neuen Barfußparcours, der ein neues Highlight am Themenweg „Werkstatt Wald und Wasser“ werden soll.“
Jo, wir in Rohr hom an gonzen Themenweg!
Bis jetzt is scho vü passiat! De Erdn homs bis jetzt soweit weg griagt, dass nochher des gonze Fühlmaterial eine duan kennan. Schaut bis jetzt echt guad aus! Owa am besten is, es schauts eich des söwa au.
De Nocht wird sicha nu länger dauern für de Landjugend. I geh jetzt owa weiter meine Tunnel grobn, de entstengan jo ned vo allanich. Wir heans uns moang, Guade Nocht!
Zur Tagwache heute um halb acht, wurden wir bereits von der Sonne angelacht
Guten Morgen! Geht’s eich guad? Hobts olle schen gschlofn?
I woit jo grod noch dera onstrengenden Nocht schlofn geh. Hod ned so funktioniert wie i ma des vorgestellt hob. Um 7:30 Uhr homs scho wieder an Lärm gmocht. Wer? De Landjugend natürlich! A Frechheit is des.
Najo, is jo a wurscht. Hauptsoch mei Fühlpfad wird boid fertig! Ned das I erna an Stress moch…Owa I gfrei mi scho echt drauf! Wö wie I scho gsogt hob siach I recht schlecht. Olle ondern im Woid san do onders…De seng wos und kennan herum renna und springa. Des mocht mi bissi traurig, dass I sowos ned kau. Dafür bin I umso glücklicher, dass I jetzt de Londjugend hob!
Dawö homs a wieder wos weiterbrocht. Den Barfußparcours homs mit Flies und Schotter bedeckt und de Bam fürs Glanda und fürn Weg homs gonz vo da Rindn befreit. Puh, des hod echt onstrengend ausgschaut! Bin I froh, dass I vü zu kla bin um do mit zu höfn.
Na guad, I versuach jetz nu bissi an Schlof zu griang. Wir hean uns später!
Und es geht heiter weiter
Ah, es seits scho do! I bin grod aufgwocht und hob mi schnö frisch gmocht für de Leid.
Es is echt vü weitergonga bei da Londjugend! De san echt schnö und fleißig. Dass des moang a wos hergibt. Der Barfußparcours nimmt scho Form au und der Zaun rundherum is a fost fertig! Echt a Wahnsinn. Jetzt bauns nu a Terrasse. Duat konn ma sie donn de Schuach ausziang und aufn Bankerl de Natur genießen. Vielleicht sechts mi jo amoi duat sitzen!
Es ist echt schen do bei mir. So ruhig und idyllisch. Zumindest bevor de Londjugend do woa. Owa I gfrei mi jo scho wie a klanes Kind auf den Platz.
Uh, I glaub do hod grod wer zum Mittagessen gruafn! Mhhh, I hob e scho so an hunger.
I meld mi später wieder bei eich. Tschüss!
Hoher Besuch
Noch dem Essen bin I wieder super gestärkt um fleißig mit zu werkn!
Es is wieder echt wos weider gonga. De Terrasse is fertig und des erste Bankerl a! Des zweite is nu in Arbeit.
Die Mädels der Gruppe hom scho Flyer gestalltet für de Projektmarathonpräsentation moang. Des Plakat homs a gmocht. Schaut echt super aus! Außerdem homs dem Barfußparcours a Schüdl verpasst.
Jo, de Mädels san echt fleißig unterwegs. Do merkt ma richtig de Frauenpower. Natürlich mochn de Burschn a wos. I bin a super unterwegs. Meiste Zeit kümmer I mi um de Erdn. Konn a Maulwurf hoid am besten!
Besuch homa a griagt. Da Bürgermeister woa mit dem Herrn Dipl.- Ing. Franz Dinhobl do. Er is in Vertretung vo da Londeshaupt Frau Mag. Johanna Mikl-Leitner unterwegs. Fotos homs gmocht mit erm und gelobt hod er uns a! Wir mochn hoid a super Arbeit.
Fertig sama owa nu long ned...I glaub de Nocht konn bissi länger wern. Auf jeden Foi hüf I den jungen Mädels und Bursch wieder. Ohne mi geht des sunst ned.
Ka Ongst, I möd mi heite eh numoi bei eich. Bis später!
Eine lange Nacht
Griaß eich, I bin wieder do!
Mittlerweile is scho finster woan. Des is jedoch ka Hindernis für de Londjugend. Es san olle nu fleißig am werkn. Natürlich homs am späten Nachmittag nu a Stärkung braucht. Dessweng san Pizza und Burger ghoit woan. I hob dawö boa Regenwürmer verspeist.
Mei Parcours is nun im Endspurt. Wir hom erm befüllt und schen hergricht.
Es is scho bissi frisch woan, desweng vertschüss I mi jetzt in mein Bau. Guade Nocht, schlofts guad. Es heats moang wieder vo mir!
Früh am Morgen
Guten Morgen!
Für an Maulwurf is 7:30 Uhr echt zu fruah, owa de Londjugend steat sowos anscheinend ned. De hom mi scho wieder mit ernan duan aufgweckt. Is owa eh besser so, sunst hätt I a nu verschlofn! Und es wissts, ohne an Maulwurf geht so a Projekt jo ned.
Sche longsom fongans au den Platz sauber zu mochn und de gonzen Materialhaufen wega zu rama. Es muas jo ollas sche wean für de Präsentation am Nochmittog! (De is übrigens um 14:00 Uhr)
Jetzt hods grod nu a klanes Frühstück gem. Ma muas jo a gestärkt sei für de nächsten boa Stunden. Es keat jo nu einiges gmocht. Owa de Londjugend Rohr siacht darin ka Problem und pockt des ollas ois Team au!
I hüf erna jetzt a wieder und bin gsponnt wen vo eich I heite oller bei der Präsentation seng werd.
Bis später, eicher Waldi!
Ende gut, alles gut
De 42,195 Stundn san jetzt leider aus. Es mocht mi scho a bissl traurig, es woa nämlich so witzig mit da Londjugend. Owa jede schene Gschicht nimmt amoi ihr Ende.
Nochdem ma sie keat hom is nu vü passiert. De Mädels und Burschen hom nu fertig zom gramt und ollas hergricht für de Präsentation. Kuchen homa griagt und Brote homa gschmiert. I hob ma heimlich wöche gnomma...owa sogts es bitte ned!
Bei da Präsentation um 14:00 Uhr woan voi vüle vo eich do! Mi hods echt gfreit, dass a a boa mit mir Fotos gmocht hom. Außerdem is da Barfußparcours voi guad bei eich aukemma. Es hom glei a boa ausprobiert. Natürlich a der Bürgermeister! Des hod mi echt gfreit.
Ollas in oim woas afoch a voller Erfoig. I konn echt stoiz sei auf des wos de Londjugend do baut hod. De homa mei gonzes Daham umso schena gmocht. Und I hob a a Gaude kobt!
I gfrei mi auf olle Wonderer de mi am Themenweg besuchn kemman und übern Barfußweg spaziern.
Natürlich muas ma si a nu bei den sämtlichen Leid bedonken de uns des Wochenende begleitet hom. A rießen Dankeschön an unsere Gemeinde de uns des gonze ermöglicht hod und de uns a mit Speiß und Trank versorgt hom. A a großes Danke an olle de uns zwischendurch klane Snacks und Trinken brocht hom. Zum Schluss a großes, na a rießen großes Danke an olle unsere Mitglieder de so brav des Wochenede gwerkt hom, ohne eich warad des afoch nix woan! Es seits da Wahnsinn.
Leider is für heier aus mit meinen Berichten über de Londjugend Rohr...owa wir hean uns nächstes Joah wieder!
Bleibts gsund und munter und schauts 2022 wieder bei unsern Blog vorbei!
Ollas Liebe und a dickes Bussi,
eicher Waldi
