Projektmarathon 2023:
Norden, Osten, Süden, Westen, da Ausblick vo da Dreibuchnkapön is afoch am besten!
Jo Liawe leid, es is wieder amoi so weit und is Projekt fia 2023 liegt scho in unsare Hände bereit.
Haumman, schwassn, schreim und Brettln trong,
owa mehr wui ma daweil no ned song.
Die Dreibuchn Kapön und ia Platzl hods in die letztn Joa a bissl erwischt,
drum hods die Gemeinde uns, da Landjugend üwagem, dass wieder in iam scheinstn Glanz erblitzt.
Mia hom natialich augnumman des Projektal mit Freid,
und uns glei in Oawatsgruppn aufteilt.
Bis Sunntog suis präsentian kinna ihr gaunze Procht,
weil do wea ma herzang, wos ma zwarahoib Tog laung hom gmocht.
Vor da Kapön homs gsetzt 3 Bam vor hunderte vor Joa,
drei Buchen woans, des is jo gaunz kloa.
Ane davo de steht glei davor,
de wird eich erzön wos heit, gestan sowie moang is und woa.
Damits in Letztstaund owa ned vagessts,
klickts unten am Link und ihr werts fost live zu uns vasetzt.
https://www.instagram.com/landjugendbromberg/?igshid=MjEwN2IyYWYwYw%3D%3D
Die drei Buchen...
I die Buche hob die Ehr,
und derf eich dazön iwa da Landjugend ihr Projekt und no fü mehr.
Heit am Freitog um sechse woas kloa,
die nächsten zwa Nächte wean kurz, jo des is woa.
Owa bevor i hiaz aufaung zum berichtn,
deaf i eich dazön vo mir, no a boa Gschichtn.
Vor hunderte vor Joah homs mi gsetzt do am Eckal,
weil beim Wödkrieg stehbliem is des wundaschene Fleckal.
Schei laungsaum foid owa da Kapön ia Putz,
des is gaunz kloa, sie steht jo a scho unta Denkmoischutz!
Dafia is is herrichten a ned gaunz so leicht,
ned, dass vom Ursprung zfü obweicht.
Owa i bin ma sicha die Jugend hods im Griff,
und vapasst da Kapön den richtigen Schliff.
Freitag Abend...
Pflastal aussa, Bankl zleng,
bei die fleissign Burschn und Menscha woa des glei gscheng.
Bevors daun owa Stana leng,
miassn sa sie no an Nauman fia eana Projekt iwaleng.
Zack is gaungan und sie homs scho ghopt,
,,Norden, Osten, Süden, Westen, da Ausblick vo da Dreibuchnkapön is afoch am besten!" homs do daun glei dazua gsogt.
Da Nauman fia erna Projekt woa somit kloa,
und i find, der is wirkli wundaboa.
A bissl organisian fia Samstag woa daun a no dabei,
owa um 22:00 Uhr obends homs as daun lossn sei.
I die Buche hob ma ned denkt,
dass ma die Landjugend hiaz scho a Ruhe schenkt.
Des woas fian Freitog owa kloa,
se song am Samstag seng ma uns wieda, i hoff des is woah.
Samstag Vormittag...
Die Jugend is a flotte Scharr,
um hoib sieben lossns as scho wieda krochn, na wundabar.
Vorher no a Frühstück beim Bäck,
do woa danoch der restliche Schotter vom Rabattl a glei weg.
An Bagger hom sa sie kuid zur Untastützung,
damits eisetzn kinna erna Kroft fia a aundare Nützung.
Während die an des Huiz vaschönen, damits in an neichn Schein erwocht,
wird am aundan Eck da Kapön ihr neiche Fassad, sche laungsaum gmocht.
Neman streichn, neich schottan und Bankl baun,
homs ned amoi vagessn des Glanda fias aulanan aufzurauen.
Mim Schleifpapier hom sies owagrim gaunz schnö,
damit a jedes klane Eckal is aktuö.
Owa hiaz is vo mir da Buachn amoi gnua,
weil i schau denan Jungan hiaz weida zua.
Ah hoit! Ans des hedi fost vagessn,
die Frau Schuster von der Raika, hod geng a boa Fotos, brocht a guads Essn.
Späta do gibts sicha wieda wos fian Bericht,
und i wia eich dazön wies weidageht mit der Gschicht.
Samstag Nachmittag...
Nochmittogs jo des woa kloa,
is weida gaungan wias vormittog woa.
I die Buche hob ois genau gseng,
und im Haundumdrehn is bis hiaz, scho einiges wieda gscheng.
Bei die ogschliffanen Bankln is weida gaungan,
und a Gruppn hod glei zum Streichn augfaungan.
Doch vo die bestehenden Sitzmöglichkeiten homs kop zweng,
daun homs a no baut zwa neiche Bankal fia a Roas mit an gmiatlichn End.
Schei laungsaum howi mi daun owa gfrogt,
wos do wui die Bevölkarung dazua sogt?
Owa den Brombergern/-innen daugt's bestimmt,
weil's vorbeibrocht hom a Eis und gmoand hom:,,Des zoid sie aus, dass ma do hiaz vorbeikimmt".
A boa moi am Tog schaun a vorbei,
zwa Menscha, wos mochn die gaunze Schreibarei.
Mit Handykameras bewoffnet und an Schmoizgrinza drauf,
rennans umadum und wuin, dass a jeda schaut am Foto guad aus.
Gaunz frech hom die Buaschn gmoand wias wieda fuat woan de zwoa:
,,Hoffentlich brauchens fias Eikaufn länga, weil des mit de Fotos des is jo ois ned woa!"
Ah', hiaz bin i scho wieda ogwichn zweit,
i dazö eich schnö weida weil sunst üwasich i die Zeit.
Während die an beim Holz erna Bestes hom gem,
wean die aundan beim Streichn und neich Vaputzn vo da Kapön ned valeng.
Im Haundumdrehn hod des neiche Kreiz wieda in an kräftign Weiss zu mir aufaglocht,
des woa mei Highlight weil des hod scho richtig vasogt.
Nem da Kapön und vorm Hergott sein Platzal,
hod a Gruppn glegt a richtig scheins Pflastal.
Mit Wasserwage und Rechn homs den Schotter no ozong,
dass gaunz genau is und kana kau wos dageng song.
A Fischgrätenmuster homs kreiert dann daraus,
und i muas song, des schaut wirklich noch wos aus!
Doch ans wasi und des is in da Zwischenzeit gaunz kloa,
die Landjugend denkt an olle, des is wirkli woa.
Damit a die Auswertign wissn wo wos umgeht,
homs montiert beschriftete Tafal wo ois genau oman steht.
Fiad Kinda dan's zeichnan rund um des Platzal an Weg,
a sogenannte ,,Spielestraße" und i glaub des wird wirklich a Red.
Doch de is no ned gaunz fertig, weil ois kau ma ned glei schoffn,
gut Ding braucht Weile und i bin scho gspaunnt wos no ois mochn!
Hob aussagheat scho a boa guade Ideen,
weils imma unta mir im Schottn stehn und laut driwa ren.
Auf'd Vitamine und auf'd Umwöd homs a no gschaut,
und heit Nochmittog glei no die oidn Mistkübeln neichbaut.
Doch wies nun weitergeht wird später geschrieben,
denn des hoid i sicha a ned verschwiegen.
I sog eich no ans des is ka Schmee,
des wird is schenste Platztl auf da gaunzn Dreibuchnhee!
Samstag Abend...
Bis spät in die Nocht hod gestern dauad de Gschicht,
i sogs eich die Jugend, de is wirklich a Gedicht.
In da Finstan homs eikead den Saund in die Fugn,
jo kean de wirklich zu die Klugen?
Hom gwusst, dass in da Fria no oawat wird sei gnua,
drum homs gem erst um 22:30 Uhr a Rua.
Doch bevors ham san homs no obaut gach des Krist,
und mim Traktor hamgfiad, dass am Sunntog ois schei is gricht.
Noch an kurzn Schreckn durchn Reng,
homs nochn Jausnan glei wieda ois gem.
,,,Erd zuwi!" woa des Kommando und mi hod's glei grissn,
weil mit an Aungzwinkan woa der Kas bissn.
Des Pflosta homs no eigrüttlt mit Hauma und Brett,
gemeinsaum mit da Erd, is des hiaz a sehr nett.
Im ,,Büroteam,, so howi gestan ghead,
homs fia moang fia die Präsentation uandlich wos aussagschead.
A Fotowaund und no füles mehr sui do sei in da Frua,
ah hiaz dazöri scho wieda so fü weida, hiaz gib i a Rua.
Kummt's vorbei moang um 14:30 Uhr,
is Plakat hobt's sicha scho gseng, weil do homs ghengt fost gaunz Bromberg damit zua.
So bis moang, Pfiat eich, guad' Nocht,
i bin gspaunnt wos die Landjugend moang aus dem Platzal no ois draus mocht.
Sonntag Vormittag:
Morgen Stund' hat bekanntlich Gold im Mund,
und um 06:30 Uhr geht's a scho wieda rund!
Mit Auhänga, Werkzeig und Sog,
san's scheinboa a heit wieda bereit fia a jede Not.
Kaum woans do is a scho grend,
und die Laundjugend hod weida dau wo gestan no woa ka End.
Vom Tafaln montian bis hin zur Kinderscharr,
es is a haumma wos Vormittog glei wieda ois geschah.
Während's fiad Kinda hom fertig gmoind de Strossn,
san aundare eiteilt woan zum aussarechan der Erd vom Rosn.
Wo friacha die Ameisen hom baut erna Wohnung,
finden jetzt a boa weitere Insekten a Belohnung.
"Insektenhotel" so hom sie's benannt,
i bin ma sicha, dem an oda aundan is der Begriff schließlich scho bekannt.
Doch a fia die Gsundheit is Vormittog gschofft woan a Platzl,
so hom's iwagrom fiad ,,Naschecke" a klans Patzl.
Vo Himbeern bis hin zu Heidelbeeren is ois zum finden,
do wird sich bestimmt wer zum Kosten überwinden.
Beim Rabattl aussahoib vo da Kapön,
deaf natialich a Stabeet a ned föhn.
Schnö hom's drin ghop den groben Schotter,
und i bin ma sicha, do is fost kaner flotter.
Wie i scho dazöd hob hom's a a boa Fotos platziert,
und dafia an Büdarahmen aus Holz kreiiert.
Mit Kluppen auf Schniadln so hengan jetzt drauf,
die fleissigen Burschen und Menscha wos gaunz Wochnend nie hom gem auf.
Des woa ned is anzige wos Vormittog scho is passiert,
weil a fia die Präsentation am Nochmittog, hom's scho einiges richtig platziert.
Zu meiner Rechten hom's scho aufgstöd a boa Bankal mit Tisch,
damit später nur mehr föd a flotter Schliff.
Oh, hiaz howi mi scho wieda vared,
und a Teil vo da Landjugend is a scho wieda weg.
Zum Glick howi aussagheat wos hiaz no geht vor,
umziang dahoam und essn san gfoan a boa.
So, hiaz schauri waun da Rest der Partie gibt a Rua,
owa i glaub mit die Oawatn geht's laungsaum dem Ende zua.
Schließlich faungt jo au um 14:30 Uhr die Präsentation,
und do suin wieder olle do sei bei mir auf da Baustation.
Projektpräsentation...
Die Mittogsruhe woa ned von launger Dauer,
do sans kumman wieda mit voller Power.
Soft, Kaffee und belegte Brot,
ois mit dabei, do brauchst da ned stön die Frog.
Fiad Vapflegung ist gsorgt und die letztn Schüda san montiert,
damit ois sein Plotz einimmt und sie die Laundjugend ned geniert.
Owa des brauchts bestimmt ned weil ans des is Gwiss,
ihr hopts vapasst da Kapön und dem Platzl an neichn Schliff.
Zwanzg Joah is her wos is letzte moi a Sanierung hom gmocht,
es kau Sie wirklich seng losn und die Laundjugend hod Großes gschofft.
I die Buche woa gaunz Wochnend dabei,
und i sog's wies woa is, de drei Tog woan richtig schnö vorbei.
Egal ob Schlechtwetter, unerwoatete Herausforderungen oder a aundre saure Suppn,
die jungen Bromberger/innen finden wirklich aussa aus jeda Luckn.
Denn ans des sogi eich gwiss,
es is ned söbstvaständlich, dass die Jugend hod so an Biss.
Bei da Präsentation söwa woa i natialich a vorhanden,
hob gseng gaunz genau wies die Leid empfanden.
Vor Stuiz üwa Daunkboakeit und Freid woa olles dabei,
i find des super und genau so suis sei!
Die Jugend hod a Freid ghop und die Grundbesitzer a,
hom zuagschaut drei Tog, so wissens wos des teilweise woa fia a Plog.
Ois Zeichn vo Daunkboakeit hods daun gem a Präsent,
wos do wui drin gwen is, weil die Leitung hod fost getränt.
Woan iwafordat mit da Situation de zwa, hiaz howis eich varodn,
san duat gstaundn mim Herrn Bürgermeister und hom sie denkt wos suins sogn?
Owa hiaz heari auf mit dera Gschicht,
sunst wird no zlaung unsa Gedicht.
Noch die Redareien is daun kumma der wichtigste Programmpunkt,
Fümschaun und Essn, ob do heit fia die Bevölkarung no wos drau kummt?
Des Festal hod daun gnumman an gmiatlichn Ausklaung,
und i muas song, i würd no zuaschaun stundenlaung.
Ach wie herrlich, dass i sowos no derf erlem,
hoff, dass i no laung do bin und fias Projektal suis Guid im Fruahjoah daun gem.
So hiaz vaobschied i mi owa ah,
wü nur mehr song, des Projekt is da Landjugend gelungen wirklich wunderbar!
Wir sagen DANKE!
A wir die Leitung wuin no song a boa Satzal,
san daunkboa, dass ma richten hom deafn so a wundascheins Platzal.
DIe Aunsprechpartner san natialich mia zwoa,
owa ohne a Untastützung geht's ned und mia song eich, des is woah.
So a Gruppn wie die Bromberger Landjugend host ned iwaroi,
und mia miassn hiaz amoi ehrlich sei, es daugt uns mit eich fui.
Egal ob Sonne, Regen oder Wind,
bei da Oawat dabei san olle imma gaunz gschwind.
A waun ma sicha ned imma leicht san und a hom unsre Phasen,
nehmt's as hin mit Humor und mochts weida wie Aumasn.
Wuin goa ned dazön hiaz a launge Litanei,
sondan uns afoch nur bedaunkn, dass so fü woan des Joah wieda dabei.
Ans is gaunz sicha und des song ma mit stuiz,
die Laundjugend Bromberg is gschnitzt aus an eigenen Huiz.
Hiaz song ma nomoi DANKE und wissn bestimmt,
a Zaumenhoit und a Gemeinschoft is des, wosd fias Leben mitnimmst.
Ihr seits wirklich a Wahnsinn und des song ma jeds Joah,
des Wochnend woa ned nur super sondan wirklich wirklich wunderboa!
Leida is vorbeigaungan wieda amoi füts schnö,
und noch ana Zeit a nimma aktuö.
Natialich gawats no für mehr zum Danke song,
Ötan, Gschwista und so weida de ma damit plong.
So hiaz is daun owa a boid gnua,
no a kurze Info und daun hopts vo uns zwa a Rua.
Wenn's aufdnocht amoi brauchts a klane Untahoidung,
mia san uns sicha, des Fotalbum is a guade Gestoitung.
Danke und pfiat eich bis nächstes Joah,
da Projektmarathon 2024 steht scho fest, des is gaunz kloa!
Die Leitung,
Claudia und Michael
