Freitag- Tag der Projektübergabe
Gfreit homma si auf unser Projekt, wie klane Kinder aufs Christkindl. Heit woas endlich soweit, da „Heilige Projektübergaben-Abend“ woa do. Unsa Projekt homa ned vom Christkindl sondern von kann aundan ois unserm Bürgermeister Josef Schrammel und Landesbeirat Gerald Spitzer gschenkt kriagt und bessa hätt mas goa ned dawischn kena. Rods moi wos in unserm Packerl drina woa? Na, ka Barbiepuppn und a ka Traktor, an neichn Mülllagerplatz für unser liabs Ortschaftl Ransdorf.
Zeit für Teamarbeit
Wir stoakn Buama und no stärkern Madln hom olle unsare Kräfte zaumanglossn und so schnö hod ma goa ned schaun kena…..homa di Wänd niedaglegt wie di Großn! Doch duat wos gibt a Hetz do gibs a a Konsequenz. Weggramt woan di Trümer schnö owa is zaumkehrn woa a quö. Noch ana klanen Pause woan ma wieda im Sause Brause. Ausgmessn homa no nie so guad, des liegt uns uandlich im Bluad. Im Bohren woa ma ned Simply the Best, wei di Pfostn san nd gstaundn fest. Owa de homa a grodbogn und so losst si sogn es woa a gelungerner Freitag Obend.
Samstag Vormittag
"In Ransdorf der Müllplotz keart gmocht" homs gsogt, owa an die Konsequenzen hom ma ned docht. Agfongt um 8 in der Fruah und scho hom ma wieder gnua. Des Wetter spüt zwar ned gaunz mit, owa trotzdem is wie immer a Hit. Noch an gscheidn Fruahstuck gehts donn a scho los, die Motivation is eh recht groß. Is Bauteam, des seit der Fruah hackelt, hod scho die Holzsteher aufgstöt, währenddessen is Dekoteam die Bienenwaben mit Stroh und Bockerl hod bebackelt. Während die Onderen sie den Hintern ogfriern, hugt is Social Media Team gmiatlich in da Goststubn und duat an Tee konsumieren. Wia meldn uns später wieder, weats scho seng wia werdn Sieger.
Zusatzaufgabe Insektenhotel
Es sui ned nur rund rennan bei da Mülltrennerei, desweng homa a Insektenhotel baut, damit a poa Käferl fliang vorbei. Aus Huiz is es konstruiert und sui a Bienenwabe instruiern. Gefüllt mit verschiedensten Materialien ausm Woid, wiad gsuagt, dass die Insekten hom ned koid. A poa Astal, Bogal und a Stroh mochn unserer Meinung noch de Viecherl froh. Des gaunze sui dafua suang, dass gnua Insekten do san a für Muang. Zum Bestäuben brauchmas immer zua, damit ma hom zum Essen gnua. Drum liebe Leute des is wichtig, leistets eichan Beitrog zum Erhoidn der Insekten richtig.
Samstag Nachmittag
Es is soweit des hittl schei laungsaum wos wird, obwuis in Wind uandlich gspiad. Da Gleichnbam steckt a scha om, dafür mias ma die Buaschn scho mui lom. Durch a fettes Schnitzl gstärkt, wird bam Doch no weidagwerkt. An Besuch vom Herrn Dinhobl homma a griagt und uandlich Lob eikassiert. Egal obs um Schollung oda Querlottung geht, unsa Motivation trotz oim weidabesteht. Is Insektenhotel homma a scho baut, ba da Gestaltung homma si kann Fehler erlaubt.
Samstag Abend
Gmessen, bohrt und gschrauft, dass uandlich hod graucht. Die Schollung auf da Seitn a scho losst sich zang, ausschaun duads wia am Plan. Jetzt brauch ma nua mehr vorne zuamochn, daun kenna mas heit richtig lossn krochn. A unsere Tischler währenddessen scho fleißig san am Werken, des duad ma an der hoib fertigen Tia merken. A di Schollung hintn ließ ned laung auf sich woatn, für moang homma guade Koatn. Natürlich dan ma a Schilder mit Beschriftungen für die Müllsackerl schreim, damit de an da richtigen Stö bleim. Heit gem ma no ois, damit ma moang daun vulla Elan unsa Projekt eich kina zang.
Sonntag Vormittag
Sunntog in da Fruah, ole Türl san fost eibaut und zua. Klein owa fein, die letztn Feinschliffe miassn a no sein. Die Obschlussleisten werden jetzt a no augschrauft guad, damit sie kana an Splitter eiziang duad. Und noch oll der hockn, hauts uns beim Anblick vam fertign Ergebnis fost aus di Sockn. Jetzt hot jeda in Ransdorf, ob groß oda kla, an plotz für sein Mist, des is gwiss.
Projektübergabe
Um drei woa daun scho a muaz Tam Tam, weil bis zur Übergabe dauerts nimma lang. Speis und Trank liegn vor, ned kafft sondern söwa gmocht vo unserer Landjugend, des is kloa. Um 15:30 san daun die erstn Leid eigrauscht und mit vulla Stuiz homma präsentiert, unsa mit vü Liebe gebautes Müllhaus. Oiso jetzt kemma sie auf die Schultern klopfn und verdient homma sie an Hopfn. Mit vuller Vorfreude woat ma scho aufs nächste Joah, do samma wieda dabei, des is kloa!
Es war uns eine Ehre, hawedere!
