Wenn ma unsan Luki kurz beschreibn miasatn, würdn wir sogn: Unsa Landjugendpapa, der jeden kennt und jeder kennt. Unser Stimmungsmacher in jeder Not. Am liebsten mant a: 

“Es seids meine Feini's”, wenn ois noch Plan rennt! 

Wir hom unsan Luki moi gfrogt, wos heit ois so weiter gaungan is. Do hod er gmant:

• begonnen wurde mitn Auzeichnan, gaunz nochn Bauplan von da Gemeinde.
• ois nächstes is mit die Schotterschaufln ausgehoben worden und anschließend wurde da Erdaushub beseitigt.
• da nächste Schritt wor, dass ma die Randsteinleiste auzeichnt hom und die Grundfläche für die spätere Pflasterung angeschottert hom.
• Endlich homa die erste Steinreihe setzen kena, hom in Zwangsmischer befüllt, die Bruchsteine angefeuchtet und die erste Reihe mit Beton hinterfüllen kena.
• Wie da Feierobend scho hergschaut hod, homa die letzten zwei Bruchsteinreihen setzen kena und hom zu guter Letzt in Beton mit Wasser und Bürste glattgestrichen.

Da Oli dat zwa sogn er hod a “Steineahnung”, owa unsa Luki behoit die Nerven und hod in absoluten Durchblick!

Neicha Tog, neiche Gsichter! Heit kummt unser Hos zu Wort. Normalerweise hod a bei uns die Zoin im Blick, owa heit huachn olle auf erm, wenns ums Pflostern geht. Dass ihr wissts, wie erna da Plan aufgaungan is, huma uns in Hos moi zuwa kuit.

Folgendes hod a uns berichtet:

• In da Frua woas moi unsa Aufgob in Split zum Huin, Gleichrechen und mit da Wasserwaage abzuziehen.
• Somit worn mia startkloa, um die erste Reihe zum Pflostern, drum hoams mit da Wasserwaage eingerichtet.
• Domit worn ma ready, Reihe für Reihe zum Zruckpflostern.
• Wies hoid so is, bleim immer Reststücke vo die Pflastersteine üwa, de ma glei sinnvoll, zum Füllen vo die Lücken verwendet hom.
• Daun homa uns in Fugensaund hergnuma, um erm mit da Rüttelplottn einzuorwatn, einzugießen und trikan zum lossn.
• Da krönende Obschluss wors, die Steinmauer zum Woschn, doss is blitze blank is!

Da Marco, die Claudia, die Lena, da Christoph und da Felix hom a ernan Weg ins hintaste Eck zu uns in Wörth gfunden. Es Projekt söwa hod durchn Regn a kurze Verschnaufpause genießen diafn, dafia homas uns im Zöt gmiadlich gmocht und es is a klane Plauderrunde entstaundn. Danke für die nette Zeit mit eich!

Unsa Babsi hod es Fotografieren in die Gene, drum stöts immer olle in Szene! CapCut, do kennt sa sie aus und no fü weiter darüber hinaus!

Wenn mas frogt, wos heite weitergaungan is, würds sogn:

Gaunz wichtig wor heit, Fotos des Endprojektes und der Mitglieder. zum mochn. Und a gaunz fü Videos für Capcut, dass es glaubts es stehts glei neben uns. Kümmert homa uns a um die Projektpräsentation, hom getextet und gereimt, wos es Zeig nur so hoit!