Wir die Landjugend Krumboch hom si heuer wieder dazua entschieden das ma da Gemeinde wos gurdes tuan und somit bam Projektmarathon mitmochn.
Am Freitag um 16:30Uhr wors don soweit, und wir hom ins mit unsan Vize-Bürgermeister, an Gemeinderat und da Verena troffn für die Projektübergabe. 
Unser Projekt is das ma die Bushaltestelle in Ödhöfen neuch aufschlogn und streichn.
Weiters suima ba da Bushaltestelle in da Sägemühle die Bretter entfernen und diese neich verkleiden und im Anschluss streichn.
A ba da Bushaltestelle in Ponholz is einiges zum Tuan, de gherd nämlich neich verankert und in neicher Bracht gestrichn.
Zu unsan Projekt gherd a dazua das ma 18 ondare Bushaltestellen säubern und ausmahn. Um das Ortsbild zu verschönern und für Sicherheit zu sorgen gherd a nau a Geländer in da Zaoralekgasse aus Holz gefertigt.
Wenns die Zeit zua losst homa aus Zusatzaufgabe grigt, das ma für unsere kleinsten Bewohner im Kindergortn a Gemüsepyramide anfertign.
Wie ma gherd hom wos ma di nächsten 42 Stunden ois zum Erledign hom, hotts uns oin fost die Sproch verschlogn. Deswegn würd i nimma vü song aussa pock ma au und schoffma gemeinsom etwas Großes, wei da Wettlauf gegen die Zeit hot stehts begonnen.

Nochdem ma uns va dem Schock erholt kopt hom, hom si unsare drei Zimmererburschen, da Lukas, da Fabian und da Raphael direkt aufn Weg gmocht das is Huiz fia unsere Bushoitestell ohbindn. Do homs don gmessn, gschnittn, ghoblt, gfast und zwischndurch überlegt ob des e ois so past. Weiters homs don die Rieglwond zom gschraubt, Streben gschnittn und gschaut das da Fürst im richtigen Winkl steht.
In da Zwischenzeit hom sie unsere fleißigen Malermäntscha aufn Weg gmocht zur erstn Bushaltestelle. De is don ohgherd gwordn und im Anschluss in an wunderschönen braunton gstrichn wordn. 
Nebenbei hom da Matthias und da Colin unsere Reisteifl si auf die Suche begeben noch da renovier-fähigen Bushaltestelle in da Sägemühle. Duat homs don ois gebn und hiaz is ka Brettl mehr steh bliem wies wor. 
A Jausal derf natürlich net fehln wei ohne Schmausen dama si nur gwölln. 
Wir hobn gorwat bis in späta Stund, don homa nomoi zsom griffn das Moang ois laft rund. Und somit wünsch ma eich a gute Nacht, unser erstes Werk is vollpracht.

 Somstog friah homa si um 7:00 troffn und a Frühstück vam Ochmannbäck genossen. Nochdem ma si amoi undli gstärkt ghob hom, homa a kurze Lagebesprechung gmocht und don is mit voller Motivation a scha los gonga. 
Unser Zimmerer da Christopher hot don glei amoi di Dreischichtplatten zua gschnittn, fia unsa Bushaltestelle in da Sägemühle.
Di Lisi, di Lena und di Resi unsere drei Putzdamen hom si don glei aufn Weg gmocht noch Ödhöfen, um duat di erste Bushaltestellen zu Säubern. Duat homs gekehrt, gewischt, geputzt dast mit gurda Aussicht im Bushäuschen huckst.
In der Zeit hom da Flo und da Stefan unsere zwa Gemüseprinzen, si um unsere klansten im Ort kümmert. Se hom nämlich di Gemüsepyramide im Kintergortn aufgstellt. Brett für Brett, Holz auf Holz, auf unsere Gemüsepyramide san wir stolz.
Weiter is don gonga in da Sägemühle duat san don di zugeschnittenen Dreischichtplatten montiert gwordn und don hom si unsere Malermeister Flo, Johannes, Stefan und di Bettina austoben derfn. Gurd is gonga nix is gscheng, des Werkl derf si lossn seng. Am Schluss homa nau is Halteschild montiert, damit di Leut wissn das des nix ondas ois a Hoitestell wird. 
Zmittog homa si don gstärkt bam Piri, das ma auft Nocht ois gschofft hom, wos ma si vorgnomma ghob hom.

 Nochn essn is don glei weita gonga, da Patrick und da Colin unsere zwa Landschaftspfleger hom si don ums Grüne rund um di Bushoitestelln augnomma. Fleißig hom sa si in Freischneider um gworfn und kan Schiebl Gros mehr steh lossn.
Die ondan hom si aufn Weg gmocht noch Ödhöfen zu unsara Hauptaufgabe, duat homa don hohen Besuch in Empfong gnomma. Denn da Franz Dinhobl mit seina Frau, di Martina Laschkowitzka und da Johann Stickelberger vo da Gemeinde und di Verena und da Felix va da Landjugend Niederösterreich hobn uns an Besuch abgestattet. Um zu Schauen obs e voran geht und ob des Projekt in bestn Händen is. Wir wuin uns hiermit a nomoi recht Herzlich fia eichre tatkräftige Unterstützung bedanken. Somit würd i song greif ma weita au, wei es is nau long.

Verstärkung homa don a bekommen va unsare Zimmerer de hom des don mui genauer vernommen. Zuerst wurd bohrt und don die Gwindstangl verpickt das unsa Bushäuschen long bleibt fit. Donn is des ois a recht schnell gonga und di Rieglwond und di Seitnwänd san boid gstondn. Do wurd versenkt so ein oda anderer Schraub damit di Dachriegl kema schnell drauf. Zwischndurch mui schauen ob ois im Winkl is damit die Gemeinde zfriedn is. Fehln hot natiali a net derfn da Gleichnbam, wei sist des Werkl net fertig gwesn wa. 
Don san a scha kema di fleißigen Malerlein und hiaz duat unsa Bushäusl fertig sein.
Wei ma scha gonzn Tog so fleißig wordn, homa in da Eifer fost vagessen, das ma in da Zaoralekgasse a Glander mocha messn. Do hot da Stefan, da Christopher, da Alexander und da Flo schnell zsom ghuifn und hom is Holz in di ideale Läng gworfn. Und zack im Nu is des Glander gstodnd, so schnell kaust gor net schaun du. 
Don homa nau gmocht a poor Bankerl fian Kindergortn. Und natiali a fia unsa Wartebushäusl net das di Leut im Steh missn wortn. Donn homa nau gmocht di letzten Pinselstriche fia den Tog, damit di Bonk long hoitn mog.
Zum Obschluss hots nau gehm a gurds Schmausal, net das ma wortn missn aufs morgige Jausal.

Am Sonntag homa wida gestartet um Siebne, damit olle orwat gscheng is, bis zum Ziele. Zuerst homa di Bankerl in Kindergortn gfiat, damit unsere klansten sitzen kina wenn da Tog moi long wird.
Don is weita gonga in Ödhöfen ba da Bushaltestelle, wei duatn hot nau gföd, is zweite Moi streichn he. Wo des gscheng wor homa nau schnell unsa Projektmarathonschild montiert und des auf Instagram gurd dokumentiert. A bissal kehrn, und a di Erd verrechen und don sama a scha wida am Gemeindeparkplotz gsessn. 
Aus nächstas is don am Plan gstondn das ma ois fiad Präsentation herrichtn. Tisch hin, Bank her, Blumen dort und dann wor di Zeit a scha fort. 
Zwischendurch homa si mui a Jausal vergunnt und grost a hoibe Stund.
Schlusssendlich homa nau a Traktorundfohrt organisiert wei unsare Projekte in da gonzn Gemeinde verteilt san. Des wor ins sehr wichtig, das di Leut unsare Werkl seng, desweng homa erna de Möglichkeit gebn.
Don homa gschaut das schnell kimp di Mehlspeis und da Kaffee, und don worn di Leut scha do gonz sche schnö.

Um 14:00 Uhr wors don soweit, unser Projektpräsentation hot augfong und wir worn fertig zur rechtn Zeit. Wir hom einige Gäst empfonga derfn, unta erna wor a da Christian Stacherl unsa Bürgermeister, di Verena va da Landjugend Niederösterreich und a da Johann Stickelberger. Danke, fia eicha tatkräftige Unterstützung. Die Lisa-Marie und di Resi hom is Projekt don präsentiert und vü Applaus kassiert. Im Anschluss homa a Traktorrundfahrt angeboten, damit di Leut si auschaun kina, wos ma gschoffn hom des Wochenende. Nebenbei hom unsere Burschen in Leit nau erklärt, wie genau des entstondn is, wos se hom gherd. Des hom di Leit a sehr gurd augnumma und des finden wir natialich Haumer. Danke a on unsan Traktorfohra in Stefan, das der so schnell zur Stelle wor, wo man hom augrufn. 
Zum Schluss wön wir uns a recht Herzlich bam Hackl Erwin bedonkn, das er uns sei Holzwerkstatt zur Verfügung gstellt hot fia di Zimmererorwatn. 

Uns is des Projekt sehr am Herzn gleng, damit wir olle kina in di schenan Bushäusln stehn. Und a die Bankerl und di Gemüsepyramide fian Kindergortn, hättn wir net lossn kina wortn. Wei wichtig is das a auf di klansten gschaut wird.

Zum Erwähnen san natiali a unsere Mitglieder, wei ohne dena erna Motivation und Können des ois hiaz net so wa. 
Somit a rießiges Dankeschön, es wor moi wida richtig schön.

Jetzt lost si nur mehr song „Bussi Baba“ und wir freuen uns schon aufs nächste Jahr.